ಸುತ್ತ ಕತ್ತಲು ಹೆಂಚಿನರಮನೆ
ಬೆಚ್ಚಿ ಬೀಳುವ ಬೇಗುದಿ
ನುಚ್ಚಿನೊಳಗಿನ ತುತ್ತ ಸವಿಯಲು
ತೆಂಗು ಕಂಗಿನ ಸೋಗೆ ತಾಕುತ
ಮಬ್ಬು ಹರಿದಿದೆ ಕಣ್ಣಲಿ
ಕಪ್ಪು ಬಿಳುಪಿನ ಚಿತ್ರ ಕರಗಿದೆ
ವಿಸ್ಮೃತಿಯ ಭ್ರಮೆಯೊಳು ಮನದಲಿ
ಮಿತಿಯನರಿಯದ ಆಸೆಗೋಪುರ
ಮಿತ್ಯವಿಹುದೀ ಬದುಕಲಿ
ಭಾವ ರಂಗದ ಕಂಸಾಳೆ ಪದದೊಳು
ಕಲಿಕೆ ಮಾತ್ರವೇ ಷಡ್ಜಗಳ
ಛತ್ರ ಚಾಮರವಿಲ್ಲ ನನಸೋಳು
ಕಿಚ್ಚು ಕಲ್ಗಳೇ ಪಥಗಳು
ಮೆಟ್ಟಿ ನಿಲ್ಲುವ ಮೆಟ್ಟು ಸಾಧನ;
ಛಲದ ಕಾಲ್ಗಳೇ ವಾಹನ
ಬಿಚ್ಚಿ ನಡೆ ನಿನ್ನಂಘ್ರಿ ಪಥದೊಳು
ಓಘವಾಗಲಿ ಜೀವನ,
ಯಾರು ತಾನೆ ಏಕೆ ಪೊರೆವರು
ನಿನಗೆ ನೀನೇ ವಿಕ್ರಮ

No comments:
Post a Comment